Bydd y ddarpariaeth o arlwyo a manwerthu mewn tair canolfan yn dod i ben fel rhan o gynlluniau gan Gyfoeth Naturiol Cymru (CNC) i arbed costau sefydliadol gan arwain at doriadau mewn swyddi a bylchau yn y gwasanaeth a ddarperir.
Mae CNC yn gyfrifol am redeg tair canolfan ymwelwyr ledled Cymru, gydag Ynyslas a Nant yr Arian yng Ngheredigion a Choed y Brenin yng Ngwynedd. Mae pob un o’r tri safle yn hynod o bwysig i economi canolbarth Cymru.
Bydd 120 o aelodau staff yn cael eu heffeithio'n uniongyrchol gan y newidiadau yma i strwythur sefydliadol CNC, sydd wedi cael eu cymeradwyo gan fwrdd CNC, wrth iddynt geisio gwneud arbedion ariannol sylweddol. Ddoe, cyhoeddodd CNC y bydd yn "symleiddio ei weithgareddau ac yn canolbwyntio ei adnoddau ar ddarparu gwasanaethau hanfodol na all neb ond CNC eu darparu.". Bydd hyn yn cynnwys ymdrechion i wella ansawdd dŵr a monitro.
Fodd bynnag, mae llawer o grwpiau a defnyddwyr lleol yn flin iawn ynghylch pa mor araf y mae CNC wedi bod i drafod gyda grwpiau lleol sydd eisoes wedi mynegi diddordeb mewn sicrhau dyfodol sefydlog i’r canolfannau ymwelwyr. Mae pryder y bydd hyn yn arwain at weithgareddau'r canolfannau ymwelwyr yn dod i ben am gyfnod estynedig o amser.
Mae nifer o fusnesau a grwpiau lleol ym mhob un o’r tair canolfan ymwelwyr eisoes wedi mynegi diddordeb mewn rhedeg darpariaeth arlwyo a manwerthu. Fodd bynnag, er gwaethaf y bwriad i gynnal cyfarfodydd cyhoeddus cymunedol ym mis Tachwedd, mae CNC yn nodi y gallai gymryd cyfnod estynedig o amser i drosglwyddo'r cyfleusterau. Yn y cyfamser, dim ond gwasanaethau sylfaenol iawn fel parcio a thoiledau y bydd y canolfannau ymwelwyr yn eu cynnig.
Dywedodd Rhodri Davies, Cynghorydd Ceredigion;
“Mae hyn yn newyddion ofnadwy i’r staff ac i ni fel ymgyrchwyr. Bydd hyn yn cael effaith ddifrifol ar y gymuned leol, twristiaeth ac economi Ceredigion. Mae angen inni roi pwysau ar CNC i ddarparu rhagor o wybodaeth a dod o hyd i ateb i sicrhau bod dyfodol i’r canolfannau ymwelwyr. Mae cyfarfod cyhoeddus wedi ei drefnu ar y 26ain o Dachwedd yn Neuadd Penllwyn, Capel Bangor.”
Ychwanegodd Ben Lake AS ac Elin Jones MS:
“Mae penderfyniad Cyfoeth Naturiol Cymru i ddod â'r ddarpariaeth arlwyo a manwerthu yng nghanolfannau Bwlch Nant yr Arian ac Ynyslas yn hynod o siomedig, a bydd y penderfyniad yn cael effaith go iawn ar drigolion lleol, cymunedau, a’r economi ehangach. Rydym yn poeni'n fawr am yr aelodau staff sydd yn cael eu heffeithio gan y penderfyniad hwn, sydd wedi gweithio’n ddiwyd dros y blynyddoedd ac sydd wedi parhau i wasanaethu o dan amgylchiadau anodd yn y misoedd diwethaf.
“Gwyddom fod Bwlch Nant yr Arian ac Ynyslas yn gwneud cyfraniad pwysig i’r economi leol, gan ddenu miloedd o ymwelwyr bob blwyddyn. Mae’r siom heddiw yn waeth gan ei fod yn dilyn misoedd o ymgyrchu a chefnogaeth gref gan drigolion lleol a grwpiau sy’n barod i weithio gyda CNC i gadw’r cyfleusterau hyn ar agor. Mae grwpiau lleol wedi dangos parodrwydd i drafod posibiliadau amgen gyda CNC i gadw’r canolfannau ar agor, ond mae methian CNC i ymgysylltu gyda hwy yn rhwystredig tu hwnt. O ystyried cryfder y gefnogaeth leol, mae’n hanfodol nad yw CNC yn gwastraffu rhagor o amser cyn ymgysylltu â’r grwpiau hynny sy’n fodlon ac yn gallu cymryd cyfrifoldeb am redeg y canolfannau yn y dyfodol.
“Yn eu penderfyniad ddoe, mae CNC yn honni y byddant yn gweithio i sicrhau trosglwyddiad "llyfn ac amserol o wybodaeth ac adnoddau" i grwpiau lleol. Rydym wedi rhybuddio yn erbyn oedi'r broses o drosglwyddo'r canolfannau gan y byddai hynny ond yn creu mwy o broblemau a heriau ariannol pellach. Mae’n rhaid i CNC gadw at eu haddewidion a'u hymrwymiadau i weithio gyda ni a phartneriaid lleol i sicrhau bod y cyfleusterau ym Mwlch Nant yr Arian ac Ynyslas yn cael eu trosglwyddo i ddwylo lleol, heb unrhyw oedi pellach, fel eu bod yn parhau ar agor i’r gymuned allu eu mwynhau.”
Dangos 1 ymateb