Diweddarwyd y dudalen yma ar 03.03.25
Ganol mis Tachwedd, cyhoeddodd Prifysgol Cymru, Y Drindod Dewi Sant ei fod yn ystyried dod ag addysg israddedig i ben ar gampws Llambed, ar ôl dros 200 o flynyddoedd. Trefnodd y Brifysgol gyfarfod gyhoeddus er mwyn trafod dyfodol y campws. Mi wnaeth Elin Jones AS cadeirio'r cyfarfod roedd yn gynnwys cyflwyniad gan yr Is-ganghellor, Elwen Evans.
Cyfarfod Cyhoeddus i Drafod Dyfodol Campws Llambed
Yn diweddar, cyhoeddodd y Brifysgol ei bod wedi cymeradwyo’r cynnig i adleoli ei darpariaeth Dyniaethau o Lambed i Gaerfyrddin. Bydd myfyrwyr y Dyniaethau yn dechrau ar y flwyddyn academaidd nesaf yng Nghaerfyrddin ym mis Medi 2025. Mae'r campws yn Llambed yn hynod o bwysig i'r dref, yn ogystal ag ar gyfer dysgu myfyrwyr. Mae neuaddau preswyl ar y campws, yn ogystal â chanolfan gelfyddydau, adeilad hardd y cwad a'r llyfrgell hefyd.
Roedd Elin yn falch o’r cyfle i allu cefnogi protest ar risiau’r Senedd ar 22 Ionawr, yn galw ar Lywodraeth Cymru i helpu sicrhau dyfodol Prifysgol a thref Llambed. Buodd Elin a Cefin Campbell AS yn cadw cwmni i nifer o gyn-fyfyrwyr, ffrindiau’r brifysgol a thrigolion o Lambed. Roeddwn yn gobeithio buasai'r Brifysgol a’r Llywodraeth yn sylweddoli pwysigrwydd eu cyfrifoldeb i sicrhau dyfodol i’r campws a’r dref. Yn anffodus, ar y diwrnod canlynol, cyhoeddodd y Brifysgol ei bod wedi cymeradwyo’r cynnig i adleoli.
Wedi'r cyhoeddiad, mi wnaeth Elin cwrdd â’r Is-ganghellor, yr Athro Elwen Evans a chytunodd y Brifysgol i drefnu cyfarfod cyhoeddus yn Llambed ar 27 Chwefror yn Neuadd Gelfyddydau'r Brifysgol. Mi wnaeth Elin cadeirio'r cyfarfod ac mi gyflwynodd yr Is-ganghellor ac uwch swyddogion cyd-destun y penderfyniad i symud darpariaeth y Dyniaethau o Lambed i Gaerfyrddin.
Yn ogystal, adeiladodd y cyfarfod ar y trafodaethau y mae'r Brifysgol wedi'u cynnal gyda chynrychiolwyr grwpiau rhan-ddeiliaid allweddol dros y misoedd diwethaf. Y bwriad yw parhau i archwilio ystod o weithgareddau sy'n gysylltiedig ag addysg a fyddai'n dod â bywyd newydd, cynaliadwy i'r campws.
Meddai Elin; "Does dim amheuaeth bod penderfyniad y Brifysgol i drosglwyddo ei darpariaeth Dyniaethau o Lambed wedi achosi pryder mawr i ni yma yng Ngheredigion, ond rwy'n croesawu'r cyfle i weithio gyda'r Brifysgol i edrych i'r dyfodol a dod o hyd i ateb hyfyw fel y gallwn ddiogelu'r campws."
Gallwch ddarllen mwy am y cyfarfod fan hyn ar wefan BBC Cymru Fyw
Dangos 1 ymateb