Yn dilyn cyhoeddi cytundeb cyllideb rhwng Llywodraeth Lafur Cymru a Jane Dodds AS, y Democrat Rhyddfrydol, mae’r aelodau lleol Elin Jones AS a Ben Lake AS wedi mynegi siom mai dim ond 0.2% oedd y cynnydd yn setliad Ceredigion.
Mae hyn ymhell islaw'r setliad cyfartalog ar gyfer cynghorau, sef 4.5%. Bydd hyn yn anochel yn golygu y bydd Cyngor Sir Ceredigion yn parhau i wynebu sefyllfa ariannol heriol.
Wrth siarad ar ôl y cyhoeddiad, dywedodd Elin Jones AS: “Dyma godiad bychan i Gyngor Ceredigion a bydd yn rhoi ychydig iawn o hyblygrwydd i'r Cyngor leddfu ei bwysau cyllidebol. O gael cynnydd is na’r cyfartaledd gan Lywodraeth Cymru, bydd effaith hyn i’w deimlo gan wasanaethau lleol pwysig a threthdalwyr Ceredigion. Pe bai’r cyllid gwaelodol wedi cyd-fynd â’r cynnydd cyfartalog o 4.3%, fel y gobeithiwyd, yna byddai’r pwysau ar wasanaethau a threthdalwyr Ceredigion wedi bod yn llawer haws.”
Ychwanegodd Ben Lake AS: "Mae'n siomedig unwaith eto fod cynghorau gwledig yn cael eu tanariannu'n anghymesur gan Lywodraeth Lafur Cymru. Mae'n ymddangos bod gogwydd cynhenid yn y fformiwla ariannu yn erbyn ardaloedd gwledig ac mae angen ymchwilio i hyn a'i unioni. Mae trethdalwyr y Cyngor mewn ardaloedd gwledig yn gorfod talu mwy na'u cyfran deg ac mae hyn yn gynyddol anghynaladwy."
Dangos 1 ymateb