Llywodraeth Cymru wedi cadarnhau bod angen cyllido er mwyn llenwi bwlch hanesyddol
Mae Elin Jones, Aelod Cynulliad Ceredigion, wedi croesawu y penderfyniad i roi £27 miliwn o gyllid ychwanegol i Fwrdd Iechyd Hywel Dda, yn dilyn adolygiad ar y costau eithafol sydd ar y bwrdd iechyd o ganlyniad i nodweddion unigryw y rhanbarth mae’n gynrychioli.
Mae adolygiad gan Lywodraeth Cymru, fel rhan o gefnogaeth Targedu Ymyrraeth a ddarparwyd i Fwrdd Iechyd Hywel Dda wedi canfod bod dau ffactor, demograffeg a graddfa, yn creu costau ychwanegol na ellid eu hosgoi.
Mae’r adolygiad, a wnaed gan Deloitte LLP, yn cadarnhau barn llawer iawn o bobl Ceredigion a chanol a gorllewin Cymru bod Hywel Dda yn wynebu set unigryw o sialensau gofal iechyd. Mewn ymateb, penderfynodd Llywodraeth Cymru i ryddhau £27 miliwn o gyllid ychwanegol rheolaidd i’r Bwrdd Iechyd.
Dywedodd Elin Jones AC:
“Dyma adroddiad i’w groesawu gan Deloitte sy’n dadansoddi costau y gellid eu hosgoi a’r rhai na ellir eu hosgoi – gan cydnabod bod demograffeg a graddfa rhanbarth Hywel Dda yn cyfrannu at gostau ychwanegol.
“Rwy’n falch bod hyn wedi darparu tystiolaeth i Ysgrifennydd y Cabinet ar Iechyd er mwyn iddo gynyddu cyllid Hywel Dda gyda £27 miliwn ychwanegol pob flwyddyn. Bydd hyn yn rhyddhau cyllid ychwanegol sydd gwir eu hangen ar gyfer gwasanaethau iechyd yng Ngheredigion. Fodd bynnag, nid oes ateb eto ar a fydd hyn yn ddigon i gwrdd ag anghenion llawn y gost o redeg y GIG yng ngorllewin Cymru.”